Noticies falses, nueva derecha y dos casos asturianos - El SOMA

Noticies falses, nueva derecha y dos casos asturianos

 

Ye mui probable que’l próximu 31 d’ochobre d’esti añu en miles de muries nes redes sociales vuelva apaecer una semeya, que’l llector asturianu de xuru conoz yá, qu’amuesa una supuesta celebración de Halloween en Siero en 1917.

La historia d’esta semeya ye mui interesante porque tien cuasi 5 años y ye posiblemente’l primer fenómenu viral asturianu que podemos relacionar colo qu’agora llamaríemos fake news, o noticies falses, y la so xénesis y desarrollu son un bon exemplu de la complexidá y diversidá que s’escuende tres d’esti conceptu y de cómo s’esparden informaciones incorrectes que son asumíes acríticamente como verdaderes por miles de persones.

Asina entamó la broma que dexó de selo

El 28 d'ochobre de 2013 l'usuariu @nachoast introduz en Twitter delles imáxenes de Halloween garraes d'Internet con dellos comentarios irónicos rellacionaos con instituciones o entidaes asturianes. Ente elles ta la semeya que nos ocupa y qu’espubliza xunto col testu "Colegio Internacional Meres. Siero. Asturias. Halloween 1917".

La ironía paez evidente, pero nun lo yera tanto: el colexu priváu al que se fai referencia nun se fundó hasta los años 60 del sieglu XX, los neños y neñes y el contestu de la semeya nun tien nada que la rellacione col colexu Meres y, amás, los nomes qu’apaecen escritos son ingleses (Maggie, Ann…). Si, amás de reparar estos detalles, restolamos na rede, vemos que la imaxe, qu’apaez en delles páxines y blogs rellacionaos con esta festividá ta sacada del llibru Haunted Air d’Ossian Brown, una publicación na qu’apaecen documentaes semeyes norteamericanes de Halloween d’ente los años 1875 y 1955.

En realidá, el tuit pasó cuasi desapercibíu hasta pa munchos followers del nuestru usuariu. Si güei accedemos al post de @nachoast vemos qu’esi tuit orixinal, qu’inda sigue accesible, nun tuvo abonda repercusión: 27 retweets y 11 me gusta.

Sicasí, la cosa entamó a enguedeyase dos díes depués, el 30 d'ochobre de 2013. Nuna de les milenta discusiones sobre l'orixe del Halloween, el so raigañu celta, etc. l'usuariu @jaimeluanco atopa la asemeya de @nachoast, nun repara en que ye una broma, apúrrela nuna conversación como una preba de la existencia d'esti tipu de celebraciones n'Asturies, tuiteándola como una semeya de Siero en 1917 y a partir d'esi momentu la semeya entama a difundise per Twitter.

 

Nos díes siguientes la semeya de “Siero” salta a Facebook, onde se fai viral a una velocidá de vértigu, y compártese decenes de miles de veces nunes poques hores a traviés páxines y perfiles personales de tou tipu qu’esparden con entusiasmu lo que consideren una auténtica ayalga.

En 2014 la semeya sigue circulando cuando s’avera la fecha de la nueche d’ánimes, pero ye en 2015 cuando se multiplica la so difusión al tuiteala el monologuista Arturo González-Campos, -que tien daquella decenes de miles de seguidores- como una semeya de Siero en Cantabria (sic) y metiendo amás en danza al franquismu.

Y, por fin, dos díes depués, la nuestra semeya sirve d’argumentu a una noticia nun mediu dixital, Voz Populi, convirtiéndose no más lleío del día y xenerando otra vuelta un argayu de retuits y noticies compartíes, colo que’l ciclu de difusión vuelve a entamar y sigue dende aquella repitiéndose cíclicamente.

Una taxonomía de les noticies falses

El términu “fakenews”, anque tien más d’un sieglu y foi usáu hasta apocayá pa referise principalmente a noticies humorístiques, ta convirtiéndose nel comodín col que la derecha política norteamericana ta sustituyendo al vieyu y despectivu “liberal media” (“los medios progresistes”). El conceptu “noticies falses” popularizóse realmente en 2016 depués de los miles d’histories manipulaes qu’aparentemente sofitaron la victoria de Trump, un dirixente que, paradoxicamente, ta consiguiendo utilizalu ente los sos siguidores pa desacreditar a los sos críticos.

En realidá cuando falamos de noticies falses (fakenews) en sentíu estrictu, referímonos a noticies concebíes y feches espresamente pa tracamundiar a los llectores algamando’l mayor tráficu posible y los beneficios derivaos d’estitráficu. Pero lo cierto ye que la complexidá de la casuística qu’atopamos oblígamos a ampliar esti significáu a otru tipu de noticies, o usar términos más xenéricos como junknews (noticies puxarra).

Pa describir esti ecosistema d’informaciones podemos usar la taxonomía emplegada por Politifact, una web que nació col oxetivu de contrastar la información duldosa que circula pela rede, y qu’estrema 4 clases de fontes:

  1. Páxines paródiques o humorístiques, qu’en dellos casos son l’orixe d’informaciones que son daes por verdá por usuarios o por otres páxines y perfiles que les modifiquen o les esparden escaeciendo o manipulando l’orixe irónicu. Esti sedría’l casu de la semeya del Halloween sierense.

  2. Páxines o perfiles impostores, que se llamen o tienen la parecencia de páxines conocíes y que s’usen pa esparder información falsa confundiendo a los receptores que s’enfoten nel supuestu autor (por exemplu la páxina CNNews3.com, que semeyaba ser CNNnews.com).

  3. Páxines o perfiles espresamente de noticies falses, nes que s’inventen informaciones qu’alimenten creencies o grupos especialmente proclives a creer teoríes de la conspiración o directamente rocambolesques.

  4. Páxines con delles noticies falses, que suelen ser medios de comunicación poco rigurosos o con pocos medios que, ensin qu’esa seya la base de la so existencia como les del puntu anterior, esparden informaciones ensin contrastar sabiendo que van tener una respuesta de l’audiencia.

Podemos amestar qu’en dellos casos hasta los llamaos medios tradicionales o con vocación de medios “serios”, afalaos pola presión de la competencia y de la necesidá d’audiencies masives que caltengan un modelu de negociu basáu nel click, pueden esparder noticies o informaciones falses ensin ser conscientes d’ello, como fixo Voz Populi nel casu de la noticia de la que falamos.

¿Tán les fake-news realmente asociaes a la nueva derecha?

Los estudios fechos hasta’l momentu suelen asociar el consumu d’esti tipu de noticies con xente que tien un perfil hipermilitante. Y dientro d’esti marcu, especialmente colos usuarios d’internet con un perfil más conservador.

Asina, nel añu 2016 un estudiu de la Universidá de California (UCLA), afitaba que la xente con ideoloxía conservadora yera más proclive a creer información falso sobre problemes de salú y l’añu pasáu dende la Universidá de Harvard, otru estudiu afirmaba que’l públicu conservador consumía más les páxines nes qu’apaecen davezu noticies falses .

Hai unes poques selmanes, un estudiu nuevu de la Universidad de Oxford concluyía que les persones más alliñaes a la derecha del espectru políticu consumen xeneralmente muncha más información de baxa calidá, estremista, sensacionalista o conspiranoica. Nel estudiu, qu’atropa datos d’esti mesmu añu, dizse qu’en Twitter una grupu específicu de siguidores de Trump consume’l mayor volume de noticies puxarra (junknews) y qu’enF acebook, la situación ye inda más evidente porque les páxines d’esti tipu que son espresamente empobinaes a usuarios d’estrema derecha comparten más información puxarra que tolos demás sectores d’audiencia xuntos.

Esti contestu ye’l qu’esplicaría’l negociu de les noticies falses que se montó en Veles, la deprimida ciudá de 55.000 habitantes en Macedonia na que se creó un sector económicu alredor de les fake-news, que xestionaba más de 100 páxines dedicaes a xenerar desinformación favorable a la campaña presidencial de Trump, non por un interés políticu, sinon pa cebar la demanda que xeneraben los seguidores del que ye anguaño presidente norteamericanu.

Sicasí, nun fai falta más qu’echar una güeyada a la rede pa decatase de qu’esti tipu d’información nun ye monopoliu de la derecha estrema, y tien una calada perimportante en dellos sectores alternativos venceyaos a la esquierda que s’afayen nun marcu nel qu’un titular acompañáu de les frases “lo que los medios oculten”, “cómo nos engañen” o “George Soros” son garantíes de clicks, retuits y shares.

Amenaza a la democracia o problema falsu

Cass Mudde, profesor de la Universidá de Georgia y autor de Populism: A Very Short Introduction y The Far Right in America defende que la epidemia d’informaciones que recibimos anguaño sobre les noticies falses y los sos peligros son una cortina de fumu p’anubrir una realidá que tamién se pue deducir de los estudios: lo más de la xente que consume esti tipu d’información “falso” tamién consume información “real” y amás les noticies falses namás valen pa confirmar les creencies de grupos concretos de persones, non pacreales.

Según esti autor, les midíes llegales, regulaciones y sanciones que se tán plantegando en mediu mundu contra l’espardimientu de les noticies falses en nome de la salvaguarda de la democracia, namás van valir per un llau pa confirmar les creencies de los sectores conspiranoicos y per otru pa crear ferramientes represives qu’afecten a la llibertá d’espresión.

Amás Mudde, apunta col deu acusador a la prensa tradicional, a la qu’acusa de nun facer bien el so papel xenerando con ello la crisis de credibilidá de los medios y la medría de medios alternativos que, en dellos casos, son el focu de les llamaes fake news. Lo más de la xente sigue obteniendo lo más de la información que recibe a traviés de los medios tradicionales, pero estos, según el profesor, quieren más culpar de les amenaces a la democracia que supón tener una sociedá mal informada a les campañes de desinformación ruses, qu’existen pero que lleguen ya inciden realmente nun númberu pequeñu de xente, qu’a la so propia incapacidá o dexadez de la función social que-yos correspuende como informadores y formadores d’opinión crítica y contrastada.

La realidá ye que per un llau la lliña qu’estrema lo falso de lo verdadero nun ye siempre fácil de tirar, especialmente cuando quien la interpreta tien el poder y unos intereses políticos determinaos, y per otru llau, dende’l puntu de vista tecnolóxicu, tornar l’espardimientu de noticies falses ye un llabor enguedeyáu y complexu.

Por ello, en cuenta d’entrar nuna espiral de midíes represives y duldosamente eficaces paez meyor afondar na alfabetización dixital, na educación que permita a la población estremar col so propiu criteriu lo verdadero de lo falso, apoyar les iniciatives independientes de “fact-checking” coles que la xente seya a contrastar les informaciones, y apostar por una sociedá na que la verdá seya un valor en sí mesma y nun se tresformen un bien de consumu que se merca nel supermercáu de la información a gustu de la suxetividá del cliente.

Exemplu de noticia falsa na que se plantegaba que dos afectaos pol tirotéu de Parklandyeren actores

Recapitulando

Nel exemplu del supuestu Halloween en Siero col qu’entamabemos tenemos sintetizada de forma canónica la forma na que se difunde bona parte de la información falsa que circula pela rede y que nun siempre respuende a un plan maléficu ideáu por una potencia estranxera o a un intentu de sofitar un argumentu orixinalmente falsu.

Hai unes selmanes otra noticia rellacionada con un supuestu adoctrimanientu nacionalista nes aules asturianes tuvo un ciclu asemeyáu hasta que se destapó que yera una noticia falsa que remanecía d’una broma. Si la noticia foi dada por cierta en páxines, medios y perfiles venceyaos a la estrema derecha que faen campaña contra la cooficialidá del asturianu, foi precisamente polo que se conoz como’l sesgu confirmatoriu; la necesidá d’atopar argumentos pa sofitar les tesis propies, nesti casu les qu’alerten sobre una delirante deriva identitaria que remanecería de la cooficialidá del asturianu, nun procesu nel que lo de menos ye la rigurosidá y el contraste. Si nesti casu dellos perfiles de redes sociales dieron por bona una información falsa nun ye solo porque sirvía a los sos intereses, anque con una mínima comprobación podía comprobase que nun yera cierta, sinon porque dende esos mesmos perfiles fabríquense dacuando noticies falses de la mesma mena y porque los sos seguidores entren dientro de la mesma categoría de los seguidores de Trump de los que falaba l’estudiu al que facíemos referencia.

En tolos casos, por estremaos que seyan, falamos siempre d’una combinación necesaria ente (1) un grupu de xente que cree firmemente nuna causa, (2) una información non real -fabricada espresamente pal casu o non- que dea argumentos de pesu pa defender esa causa, (3) una cultura militante d’usu de les redes sociales na que contrastrar la información resulta irrelevante, porque les noticies son armes que valen p’afitar les visiones previamente asumíes, y (4) daquién que zarra’l ciclu -y dacuando y precisamente por ello, tamién lu abre- y saca beneficiu de tolo anterior ganando; cuando popularidá, influencia, o dineru a traviés de los clicks que xenera la publicidá contestual que da les audiencias elevaes; cuando enxertando en sectores concretos de la opinión pública la so axenda política.

Nesi sen tol mundu gana, menos la verdá.

Acerca de

Autor

David Guardado

Compartir